У гіт-парад трапляюць альбомы беларускіх музыкаў, запісаныя ў апошні год. Агулам зьбіраецца 12 удзельнікаў туру - г.зв. тузін. Удзельнічаюць альбомы беларускамоўных (часткова беларускамоўных) выканаўцаў, а таксама канцэптуальныя складанкі песень, выдадзеныя за гэты час. З 2019 году разглядаюцца таксама міні-альбомы з 4-7 трэкаў, EP.
Кожны тур гіт-параду цягнецца каля трох месяцаў і адпавядае пары году (восень, зіма, вясна). Пасьля падвядзеньня вынікаў галасаваньня, чарт абнаўляецца цалкам, і галасаваньне пачынаецца спачатку. Улетку праводзіцца мэгатур па вызначэньню найлепшага альбому, у якім удзельнічаюць усе рэлізы сэзону.
Права прыняцьця канчатковага рашэньня аб уключэньні або неўключэньні ў гіт-парад альбомаў на TuzinFM рэдакцыя парталу пакідае за сабой.
Галоўнае патрабаваньне да ўдзельнікаў гіт-параду ды іх прыхільнікаў весьці шчырую барацьбу. Галасаваць можна зарэгістраваным на сайце карыстальнікам, а таксама зайшоўшы ў свой акаўнт ў сацыяльнай сетцы (Facebook, УКантакце) адзін раз на суткі, абіраючы адзін, два або тры альбомы.
Схавацца ў туман
Дэбютны альбом санграйтэра зь Менску, які быў намінантам на «Адкрыцьцё году» прэміі «Героі году — 2016».
Зьмяіны цар
Праект «Віктар Сямашка ды Кумпанія» апублікаваў на tuzin.byculture.org альбом «Зьмяіны Цар», цалкам створаны на словы Максіма Багдановіча.
Иллюминация
Трэці студыйны альбом гурту, які заснавалі Арцём Лук’яненка і Ксенія Жук, выдадзены акурат у дзень беларускага адбору на «Эўравізію».
Адчувай
Пасьля двух гадоў працы гурт Pauline прэзэнтуе свой першы альбом, які атрымаў назву «Адчувай».
Аднакарэнныя
Праект Belaroots аб’яднаў творцаў, якія перакананыя ў тым, што рэпу па-беларуску мусіць быць шмат.
Танцпляц
У альбомным чарце на tuzin.byculture.org адно з адкрыцьцяў-2016 у беларускай музыцы — гурт SnopSnoǔ прэзэнтуе свой дэбютны альбом «Танцпляц».
Жнівень
Фольк-рок гурт зь Віцебску прэзэнтаваў дэбютны альбом «Жнівень», запісаны праз 13 гадоў пасьля свайго стварэньня.
Сом
Гурт Ганны Хітрык запісаў альбом гісторыяў — асабістых, пачутых і ўбачаных ды крыху дадуманых. Па выніку атрымалася 16 песень, якія падзялілі на два дыскі.
Dobrazol
«Dobrazol» — трэці нумарны альбом пераможцы «Басовішча-2016» праекту «.K» і першы запісаны ў фармаце трыё.
Псыхасаматыка
Новы дыск Вольскага складаецца з 16 песень, падзеленых на дзьве цалкам розныя па гучаньні часткі: «Горад» і «Лес».
Мітатворчасьць
Першы сольны альбом сьпявачкі ўяўляе зь сябе збор мітаў і легендаў, а кожная песьня зьяўляецца кароткай казачнай гісторыяй.
Камэта
Зьміцер Вайцюшкевіч запісаў альбом надзвычайнае прыгажосьці, які можна паставіць упоравень з «Паравінамі году». На жаль, ён не ацэнены належным чынам.
Płastyka
У чацьвертым альбоме гурт Akute працягвае балянсаваць паміж жыцьцём і сьмерцю ў лірыцы і ўдала спалучаць арыгінальныя знаходкі з штампамі ў музыцы.
Kufar
Гурт Re1ikt прэзэнтуе новы альбом «Kufar», у які ўвайшлі песьні, напісаныя ў апошнія два гады.
Sonca
Для альбому «Сонца» беларускія народныя песьні аранжыраваныя ў рэчышчы актуальнай клюбнай музыкі. Слухачоў чакае атмасфэрны дып-гаўс з адточаным гукам і глыбокім басам.
Жыта. Жыцейка
Свой новы альбом «Žyta. Žycejka» гурт «Мярэжа» называе гісторыяй жанчыны-маці і жанчыны-дачкі, жанчыны-жонкі і жанчыны-каханкі.
Мы
Гурт NGe выдаў альбом «Мы», у якім прэзэнтаваў сваё новае гучаньне. Музыкі спалучылі рок-саўнд з электронным.
Трымай свой час
«Трымай свой час» — чацьверты нумарны альбом IQ48, які выйшаў акурат на 15-годзьдзе гурта.
Прыцягненьне
Дэбютны альбом менскага рок-гурта без гітараў, да стварэньня якога музыкі прыйшлі неплянавана, на інтуіцыі.
Niamiha
Этна-авангардовы гурт Essa выдаў свой першы альбом на дзьвюх кружэлках: адна ў выглядзе кампакт-дыску зьмяшчае аўдыё- і відэа-матэрыялы, а другая папросту выразаная з наждачнае паперы.
Калі Госпаду Баліць
Беларуска- і часткова ўкраінскамоўны альбом гурта з Бэрліну, які заснаваў культурны правакатар зь Менску.
Мая малітва
Запіс першага ў дыскаграфіі беларускамоўнага альбому, стаў для каманды Насты Шпакоўскай сапраўдным выпрабаваньнем, якое музыкі прайшлі годна.