Recha: «Дзяўчаты, сьцеражыцеся паэтаў, не кахайце музыкантаў!» (прэм’ера)

Андрусь Такінданг прадстаўляе песьню «Дурніца» з дэбютнага альбому гурта, якога чакалі 10 гадоў.

«Дурніца» прадстаўляецца як настраёвая балада, рэтра-стылізацыя пра спатканьні і растаньні. Яе аўтар Андрусь Такінданг кажа: «Калі перадаць зьмест песьні адной фразай, дык яна будзе гучаць так: дзяўчаты, сьцеражыцеся паэтаў, не кахайце музыкантаў!». Гэты твор увойдзе ў альбом «Перайначыць», які ўжо гатовы да выданьня. Гэта першы рэліз ад гурта за 10 гадоў існаваньня! І ў ім будзе нямала сюрпрызаў. Да клясычнага складу Recha (Андрусь Такінданг — домра, голас; Яўген Шурмей — гітара; Віктар Паўлючэня — акардэон; Кастусь Лісецкі — бас-гітара; Леанід Паўлёнак — барабаны) у некаторых кампазыцыях далучыліся сьпявачкі — Паліна Паланейчык ды Марына Вярэніч, а таксама саксафаніст Аляксандар Арашкоў.

«Наша кружэлка атрымалася мяккай, лагоднай, лірычна-карчомнай. Але на жывых канцэртах усё будзе выглядаць заліхвацка-танцавальным», — заўважае Андрусь. Увесь альбом, куды ўвайшло 13 кампазыцыяў, Recha плянуе выкласьці пасьля канцэрту-прэзэнтацыі, які заплянаваны на 24 лістапада ў менскім клюбе TNT.

Recha — Дурніца (музыка гурта, словы Андруся Такінданга). Зьмяшчаецца са згоды выканаўцы.

Tuzin.fm

Убок твой не глядзіць, і не шукае шчасьця,

Жыцьцё яму гульня, жыцьцё яму — канцэрт.

Паслухай, ёсьць другі, які цябе кахае,

які даўно з табой, як непрыкметны цень…

Але, тут рады даць ня могуць і анёлы:

ляціш ты да таго, хто на ўсё плюе.

І ад бяды яго, паўмёртвага дадому,

таксі-мэтро-таксі — праз горад на сабе.

Табе падорыць верш, ды не падорыць сэрца,

хто побач за сталом — яму ўсё адно.